1735899011
ავტორი
ნინი მეტრეველი
არ აქვს მნიშვნელობა, რამხელაა სივრცე, რომელშიც ვცხოვრობთ — კარადის გარეშე არაფერი გამოვა და ის დიზაინის განუყოფელი ელემენტია. რაც მთავარია, აქვს როგორც ფუნქციური, ისე ესთეტიკური დატვირთვა. ფერები, სახელურები, წყობა, ტევადობა — კარადის დიზაინმა და სტრუქტურამ, შესაძლოა, ოთახის იერსახე რადიკალურად შეცვალოს. განურჩევლად ოთახის ფუნქციისა, ნებისმიერ სივრცეში პატარა კარადის საჭიროება მაინც არის. ჰარმონიის უზრუნველსაყოფად კი, აუცილებელია, ფუნქცია და დიზაინი სწორად შევარჩიოთ.
ინტერიერის დიზაინში კარადის ფუნქციური დატვირთვა იმდენად დიდია, რომ პროფესიონალები ხშირად ცდილობენ, კედლებში ჩამალონ, რათა სივრცე მაქსიმალურად აითვისონ. საცხოვრებლის ორგანიზება და, შესაბამისად, სივრცის ესთეტიკის შენარჩუნება კარადის უპირველესი ფუნქციაა. პირველ რიგში, სწორედ ამის წყალობით ხდება ბინა ვიზუალურად მიმზიდველი — არ არის არეულობა და თვალსაჩინო ადგილას არ დევს საყოფაცხოვრებო ნივთები. თუმცა, გარდა ამისა, სწორად შერჩეულ მასალასა და დიზაინს შეუძლია სრულად შეცვალოს ოთახის ხასიათი, გამოკვეთოს ინდივიდუალიზმი და შემატოს დახვეწილობა.
შემოსასვლელი დერეფანი ნებისმიერი ადამიანისთვის პირველი შთაბეჭდილებაა. შესაბამისად, მაქსიმალურად უნდა ვეცადოთ, ეს სივრცე მოწესრიგებული, სუფთა და ზედმეტი ნივთებისგან თავისუფალი იყოს. თუ დერეფანში საკმარისი ადგილი გაქვთ, კარგი იქნება, თუ გამორჩეული დიზაინის დახურულ კარადებს გააკეთებთ. ასეთ შემთხვევაში, თავიდან აირიდებთ საკიდზე ჩამოკიდებული ქურთუკებითა და მათ ქვეშ დაწყობილი ფეხსაცმელებით გამოწვეულ არეულობას. დახურული კარადები ასეთი ნივთების შესანახად იდეალურია. მეორე მხრივ, დახვეწილი დიზაინი, გარკვეულწილად, განაცხადია, რომ დანარჩენ ოთახებშიც იგრძნობა სტილი და ინდივიდუალიზმი.
შემოსასვლელი კარადის დიზაინი ეფექტურია მაშინ, როდესაც კარის ფაქტურა, სახელური ან სტრუქტურა ვიზუალით გამოირჩევა. თუ დერეფანში დიდ სარკესაც გამოიყენებთ, ამით სივრცის უფრო ფართოდ აღქმასაც შეუწყობთ ხელს.
თუმცა, რა თქმა უნდა, დიდი კარადებისთვის საკმარისი ადგილი ყველა ბინაში არ არის. ასეთ შემთხვევაში, გირჩევთ ქურთუკებისთვის ტრენდული საკიდი შეარჩიოთ, ფეხსაცმელებისთვის კი — ორი ერთში ტუმბო, რომელსაც შიგნით სათავსოც ექნება.
ტანსაცმლის კარადა ნებისმიერი საძინებლის აუცილებელი კომპონენტია. ალბათ, ყველა ადამიანის ოცნებაა, ტანსაცმლის შესანახად ცალკე ოთახი ჰქონდეს გამოყოფილი. თუ ამის საშუალება გვაქვს, შეგვიძლია თაროები ისე გადავანაწილოთ, რომ ნებისმიერი სეზონის ტანსაცმელი ყოველთვის ხელმისაწვდომი იყოს და მათ გამოღება-შენახვაში დროსა და ენერგიას აღარ დავხარჯავთ. ამავე სივრცეში შევძლებთ ფეხსაცმელებისა და აქსესუარების შენახვასაც. ცხადია, ეს ყველაფერი მომზადების პროცესს სასიამოვნოსა და კომფორტულს ხდის. თუმცა, რა უნდა გავითვალისწინოთ, თუ ტანსაცმლის შესანახად ცალკე, თუნდაც პატარა ოთახი არ გვაქვს და კარადა საძინებელში უნდა დავდგათ?
პირველი, რასაც ყურადღება უნდა მივაქციოთ, პრაქტიკულობაა — გაითვალისწინეთ, რომ კარადაში ადგილი უნდა იყოს როგორც დასაკეცი, ისე დასაკიდი ტანსაცმლისთვის, რათა ყოველ ჯერზე უთოს გამოყენება არ გვიწევდეს. ასევე, ცალკე განყოფილება უნდა არსებობდეს შიდა თეთრეულისთვის — ეს ჰიგიენისთვის აუცილებელია. იზოლირებული უნდა იყოს თაროები ფეხსაცმლისთვისაც.
რაც შეეხება ვიზუალურ მხარეს, პრაქტიკული და ტრენდული იქნება, თუ კარადის ერთ კარს სრულყოფილად სარკით დაფარავთ. სხვათა შორის, ბოლო პერიოდში განსაკუთრებით პოპულარულია კარადები კარის გარეშე. თუმცა, თუ ტანსაცმლის იდეალურ მდგომარეობაში შენახვის დრო არ გაქვთ, უმჯობესი იქნება, თუ ამ ტრენდს არ აჰყვებით.
ზოგადად, კარადა სარკით დიზაინში პრაქტიკული და ელეგანტური გადაწყვეტაა, არ აქვს მნიშვნელობა, რომელ ოთახშია ის მოთავსებული. სარკიანი კარადა დიდი, ნათელი სივრცის ილუზიას ქმნის და განსაკუთრებით მნიშვნელოვანია პატარა ოთახისთვის, სადაც სივრცის მაქსიმიზაციაა საჭირო.
არ არის აუცილებელი, ერთგვაროვანი, სტანდარტული სარკით დაფაროთ კარადის კარის ზედაპირი. შეგიძლიათ, დიზაინერული ელემენტები შეიტანოთ და ავეჯის ზედაპირს განსაკუთრებული იერსახე მისცეთ.
უნივერსიტეტების საერთო საცხოვრებლები, აგარაკები, პატარა ბინები საზღვაო, თუ სამთო კურორტებზე — ასეთ სივრცეებში კარადებისთვის საკმარისი ადგილი არასდროსაა. არადა, შესანახი ნივთი ბევრია. ასეთი მცირე ფართებისთვის ნაჭრის დასაკიდი კარადები თუ თაროები იდეალურია. მართალია, მარტივად იმტვერება და არც ისე ტევადია, თუმცა, სეზონურ არდადეგებს უმტკივნეულოდ გადაგვატანინებს. გარდა ამისა, ეკონომიურია და, ჩაშენებული კარადისგან განსხვავებით, ნაკლებ ბიუჯეტთანაა დაკავშირებული.
რა თქმა უნდა, სამზარეულოს დიზაინი ცალკე სტატიის თემაა, რადგან ამ მრავალფუნქციურ ოთახში სივრცის უმეტესი ნაწილი, სწორედ, კარადებს უკავია. ამ სტატიაში კი გირჩევთ, როგორ გამოკვეთოთ ჭურჭლის კარადა ისე, რომ, დიზაინერული თვალსაზრისით, თვალშისაცემიც იყოს და პრაქტიკული თვალსაზრისით, კომფორტულიც.
ამისათვის, საჭიროა ჭურჭელს ორზე მეტი სექცია დავუთმოთ. ორი სექციის ზედაპირი დავტოვოთ გამჭვირვალე (განსაკუთრებით პოპულარულია ვინტაჟური სტილი), დამატებით ერთი ან ორი კი — დახურული. ასეთი მეთოდით შეძლებთ, თქვენთვის სასურველი ჭურჭელი ყველასთვის შესამჩნევი იყოს, ნაკლებად მომხიბვლელი კი დახურულ კარს მიღმა შემალოთ.
სამზარეულოში თაროების ღიად დატოვება ბოლო წლების ტრენდებში საკმაოდ ხშირად გვხვდება. რამდენად პრაქტიკულია ასეთი წყობა, ეს ჩვენზეა დამოკიდებული — შესაძლოა, მშვენივრადაც მოვირგოთ ასეთი სტილი.
ასევე, რადგან ზოგადად პოპულარულია ვინტაჟური მიმართულება, 2024-ის ინტერიერის დიზაინერები ხშირად გვირჩევენ, სამზარეულოში მასიური ხის, ძველი, თუმცა რესტავრირებული ჭურჭლის კარადები განვათავსოთ.
ფერი, თავისთავად, გადამწყვეტია. ისევე, როგორც ყველა სხვა დეტალის შემთხვევაში, კარადის ფერის არჩევისასაც ნეიტრალური ტონები მუდმივია, მკვეთრი ფერები კი დიზაინს ინდივიდუალიზმს სძენს.
თუ გაბედული გადაწყვეტილებები გახასიათებთ, გარისკეთ და უპირატესობა მიანიჭეთ წლის ყველაზე ტრენდულ ფერებს — ლურჯი, ზურმუხტისფერი, ნარინჯისფერი. თუმცა, გაითვალისწინეთ, რომ ასეთ შემთხვევაში, კარადა ინტერიერის მთავარი აქცენტი იქნება და მისი განეიტრალება სხვა დეკორატიული ელემენტებით მოგიწევთ.
სახელური, მიუხედავად იმისა, რომ პატარა დეტალია, შეიძლება საერთო დიზაინისთვის გადამწყვეტი აღმოჩნდეს. გარდა იმისა, რომ კომფორტული და კარის ზომის შესაბამისი უნდა იყოს, საყურადღებოა მისი ვიზუალიც.
თანამედროვე სივრცეს ძალიან უხდება გლუვი, მეტალის სახელურები. ორნამენტებიანი დიზაინი კი, უმეტესად, ტრადიციულ ინტერიერს მატებს ხიბლს. თუმცა, ამ მიმართულებების არევას, ცხადია, არაფერი უდგას წინ. სრულიად სადა და მინიმალისტური კარადის კლასიკური დიზაინის მქონე სახელურით დამშვენება, შესაძლოა, ინტერიერის დიზაინში საინტერესო განაცხადიც იყოს.
1736429640
1737378462
1737110160
1737036300
1737466752
1733692140
1731504900
