თბილისის უძრავი ქონების ბაზრის მიმდინარე ტენდენციები

უძრავი ქონების ბაზარი ხშირად ქვეყნის ეკონომიკის სარკეა. მისი აქტივობა პირდაპირ კავშირშია სამუშაო ადგილებთან, მშენებლობასთან, ფინანსურ სექტორთან და მოსახლეობის შემოსავლის დონესთან. როდესაც ბაზარი აქტიურია, ეს მიანიშნებს კაპიტალის მოძრაობასა და საინვესტიციო ინტერესზე, შემცირებული მოთხოვნა კი, შესაძლოა, ეკონომიკისთვის ერთგვარი ვარდნის სიგნალიც იყო. სწორედ ამიტომ, უძრავი ქონების სექტორზე დაკვირვება ყოველთვის მნიშვნელოვანია, რასაც საერთაშორისო და ადგილობრივი კვლევებიც ადასტურებს.

ზაფხულის ბოლო თვე თბილისის უძრავი ქონების ბაზრისთვის არცთუ წარმატებული გამოდგა. აგვისტოში დედაქალაქში გაყიდული ბინების რაოდენობამ 2 800-ს ოდნავ გადააჭარბა, მაჩვენებელი 10%-ით ჩამოუვარდება ივლისის მონაცემებს და 22%-ით ნაკლებია გასული წლის ანალოგიურ პერიოდთან შედარებით.

გაყიდვების შემცირების მიუხედავად, ანალიტიკოსები ამ ტენდენციას ოპტიმიზმით უყურებენ. თიბისი კაპიტალის კვლევის მიხედვით, გაყიდვების ვარდნა სეზონურ (კალენდარულ) ფაქტორებს უკავშირდება. „წელს აგვისტოში ორი სამუშაო დღით ნაკლები იყო, ვიდრე შარშან, რაც ოფიციალურ რეგისტრაციებზე აისახა,“ — აღნიშნულია კვლევაში.

ბაზრის მოცულობამ აგვისტოში 230 მილიონ დოლარს მიაღწია, რაც 7%-ით ნაკლებია წინა თვესთან შედარებით. პარალელურად, ფასების დინამიკა მაინც მზარდია და კვადრატული მეტრის საშუალო ფასი 4%-ით გაიზარდა და 1 283 დოლარს გაუტოლდა.

განსხვავებული სურათია გაქირავების სეგმენტში — ბინის ქირის ფასის ორციფრიანი მაჩვენებელი 12%-ით შემცირდა და კვადრატულ მეტრზე 10.2 დოლარი შეადგინა. თიბისი კაპიტალის გათვლებით, საცხოვრებელი ბინების ამონაგები წლიურად, მართალია, 1.4 პროცენტული პუნქტით შემცირდა, თუმცა თითქმის 8.5%-მდე შენარჩუნდა.

სპეციალისტები ფასების ზრდას რამდენიმე მიზეზით ხსნიან, მათ შორის თბილისში სამშენებლო მიწის დეფიციტით, სამშენებლო მასალების გაძვირებითა და სექტორში დასაქმებულთა ანაზღაურების ზრდით.

ქალაქის მასშტაბით, გაყიდვების მიხედვით კვლავ დიდი დიღომი ლიდერობს, ყველაზე მაღალი წლიური ზრდა კი კრწანისშია, ყველაზე მაღალი საშუალო ფასებით ლიდერობას კვლავ ვაკე და მთაწმინდა ინარჩუნებს. ამ უბნებში კვადრატული მეტრის ღირებულება 2 000 დოლარსაც აღემატება, რაც ყველაზე იაფიან უბნებთან შედარებით, დაახლოებით, 900 დოლარით მეტია.

ექსპერტები შემოდგომის თვეებში გაყიდვების გააქტიურებას ვარაუდობენ და მიიჩნევენ, რომ ეს აგვისტოს ვარდნას დააკომპენსირებს. მათივე შეფასებით, მაღალი ფასები, სავარაუდოდ, შენარჩუნდება, რადგან მიწის დეფიციტი და სამშენებლო ხარჯების ზრდა კვლავ ზეწოლას ახდენს ბაზარზე.

რაც შეეხება ინვესტორებს, მათთვის უძრავი ქონების გაყიდვის გარდა, შესაძლოა, განსაკუთრებით საინტერესო (ქირის ფასის შემცირების მიუხეადავად) გაქირავების სეგმენტი იყოს, განსაკუთრებით ტურისტულად აქტიურ უბნებში.

რაც შეეხება მყიდველებისთვის რეკომენდაციას, უძრავი ქონების ბაზრის სპეციალისტები ამბობენ, რომ მსურველებმა არ უნდა უგულებელყონ შედარებით „იაფიანი“ უბნები, რადგან ფასების ზრდის პოტენციალი ამ შემთხვევაში უფრო მაღალია, დეველოპერებისთვის კი ახალი პროექტების სწორი ადგილმდებარეობის შერჩევაა მნიშვნელოვანი, რადგან ბაზარზე კონკურენცია სწორედ ადგილითა და ხარისხით იზომება.