თბილისში მშენებარე ობიექტებზე ინფორმაციის გადამოწმება ელექტრონულად იქნება შესაძლებელი

თბილისის მერიამ უძრავი ქონების შეძენის მსურველთა დაცვის მიზნით, აამოქმედა ახალი ციფრული მექანიზმი, რომელიც მოსახლეობას მშენებლობებთან დაკავშირებით უფრო გამჭვირვალე და სანდო ინფორმაციას მიაწვდის. დედაქალაქის ინტერაქტიურ რუკაზე განთავსდება ინფორმაცია მუნიციპალური ინსპექციის მიერ ექსპლუატაციაში უკვე მიღებულ შენობებზე და იმ ობიექტზეც, რომელთა მშენებლობაც შეჩერებულია.

თბილისის მერის განმარტებით, ეს ნაბიჯი მოქალაქეებს დაეხმარება სწორად შეაფასონ რისკები, სანამ უძრავი ქონების შეძენის გადაწყვეტილებას მიიღებენ. ეს ძალიან მნიშვნელოვანია თბილისისთვის, სადაც წლების განმავლობაში მრავლად იყო დაუმთავრებელი პროექტები და დაზარალებული მყიდველების რიცხვიც იზრდებოდა. ახალი პლატფორმა ერთგვარ გარანტიად უნდა იქცეს, რათა უძრავი ქონების შეძენისას სწორი გადაწყვეტილება მივიღოთ.

კახა კალაძის თქმით, ეს ინიციატივა ხელს შეუწყობს მოქალაქეების უფლებების დაცვას. „უმნიშვნელოვანესია, დავიცვათ ჩვენი მოქალაქეების საკუთრების უფლება, კეთილსინდისიერი მყიდველები და მათი უფლებები, რომლებიც უძრავი ქონების შენაძენს აკეთებენ მშენებარე თუ ახალაშენებულ ობიექტებში", — განაცხადა მერმა, თუმცა, მეორე მხრივ, ცვლილებამ სამშენებლო კომპანიების პასუხისმგებლობა უნდა გაზარდოს.

„წლების წინ არსებობდა სამშენებლო კომპანიების მხრიდან დაზარალებული მოქალაქეების პრობლემა, რომლის გადასაჭრელად არაერთი ქმედითი ნაბიჯი გადავდგით. დაუმთავრებელი მშენებლობების პროგრამის ფარგლებში, ათასობით დაზარალებული მოქალაქე დავაკმაყოფილეთ. მშენებლობის მაღალი ხარისხის მისაღწევად და დარღვევების პრევენციისთვის, ასევე, გავამკაცრეთ სამშენებლო კონტროლი და ობიექტების ექსპლუატაციასთან დაკავშირებით მივიღეთ შესაბამისი ზომები. გატარებული ღონისძიებების შედეგად, მნიშვნელოვნად გაზრდილია სამშენებლო ობიექტების ექსპლუატაციაზე მომართვიანობა და, შესაბამისად, მიღების მაჩვენებელიც. აღნიშნული ინიციატივაც იქნება ერთგვარი მექანიზმი, რომ გაიზარდოს სამშენებლო კომპანიების პასუხისმგებლობა და ანგარიშვალდებულება მომავალი მესაკუთრეების წინაშე, მშენებლობის პროცესში სრულყოფილად შეასრულონ თავიანთი ვალდებულებები და დაიცვან სანებართვო პირობები“, — აღნიშნა კახა კალაძემ.

დაუსრულებელი მშენებლობების პრობლემა საქართველოსთვის ახალი რომ არ არის, ამას ჩვენს დედაქალაქში არსებული რეალობაც ადასტურებს, თუმცა „გაყინული“ მშენებლობები ბევრ ქვეყანაში გვხვდება, რაც სხვადასხვა ეკონომიკურ, სამართლებრივ, ფინანსურ თუ ადმინისტრაციულ ფაქტორს უკავშირდება. ბევრ ქვეყანაში არსებობს ქონების რეგისტრაციის დახვეწილი სისტემა, არის ელექტრონული რეესტრის დიდი პრაქტიკაც, მაგრამ მშენებლობების დასრულების 100%-იანი გარანტია მაინც არ არსებობს და იდეალურად გამართული რეესტრიც კი ვერ უზრუნველყოფს სამშენებლო პროცესის სრულ გამჭვირვალობას.

და მაინც, რა იწვევს მშენებლობების დაუსრულებლობას? ზოგიერთ შემთხვევაში ეს გამოწვეულია დეველოპერების წინდაუხედავი გათვლებით, არასაკმარისი ფინანსებითა თუ კომპანიების გაკოტრებით. მეორე მხრივ, პრობლემაა ზედამხედველების მხრიდან არასაკმარისი კონტროლიც თავად მშენებლობის პროცესში და სამუშაოების დასრულების შემდეგ აღმოჩენილი ხარვეზების გამო, ასეთი უძრავი ქონების ექსპლუატაციაში მიღება ჭიანურდება.