მოგზაურობისას თუ უბრალოდ ქუჩაში სეირნობისას, ყველაზე მეტად ჩვენს ყურადღებას გამორჩეული არქიტექტურული შენობები იპყრობს, რომლებიც, გარდა ესთეტიკური ტკბობისა, აღტაცებას, გაკვირვებას იწვევს და პროექტის ავტორის, არქიტექტორის როლზე გვაფიქრებს. თუმცა ამ დაკვირვებისა თუ შემოქმედებითი ხედვის პროცესში ხშირ შემთხვევაში გვავიწყდება მშენებლობაში კრიტიკულად მნიშვნელოვანი რგოლი — კონსტრუქტორი, რომელიც ერთგვარი „რუხი კარდინალია“. ის კულისებს მიღმა მუშაობს, არქიტექტორივით არ ჩანს წინა პლანზე, თუმცა უაღრესად მნიშვნელოვან გადაწყვეტილებებს იღებს, ობიექტის მშენებლობას წარმართავს და შენობის უსაფრთხოებასა და სიმყარეს უზრუნველყოფს.

კონსტრუქტორის პროფესია სამშენებლო პროცესების მართვისა და ინჟინერიის ცოდნას აერთიანებს. ის ერთ-ერთი უძველესი და დიდი მნიშვნელობის მქონე საქმიანობაა, რომელიც ცივილიზაციის განვითარებასთან და ტექნოლოგიურ პროგრესთან ერთად დაიხვეწა და შეიცვალა. მას საფუძველი პრეისტორიულ ხანაში, ძველი ცივილიზაციების პერიოდში ჩაეყარა, როდესაც ადამიანმა თავშესაფრების, სამეურნეო ნაგებობებისა თუ საცხოვრისის შენება დაიწყო.

სწორედ კონსტრუქციული გადაწყვეტების და არქიტექტურული ცოდნის შედეგია ძველი ეგვიპტის ცივილიზაციის პირამიდები, შუამდინარეთის ტაძრები და ანტიკური საბერძნეთისა და რომის ისეთი არქიტექტურული შედევრები, როგორიცაა აკროპოლისი და კოლოსეუმი. ინჟინერიისა და არქიტექტურული დეტალების ღრმა ცოდნას მოითხოვდა შუა საუკუნეების გოთიკური არქიტექტურა, რენესანსის ეპოქის ხელოვნება და თანამედროვე ცათამბჯენები, რომლებიც ტრადიციულ კონსტრუქციულ ხერხებთან ერთად, ინდუსტრიულ ტექნოლოგიებსა და ახალ მასალებს, მშენებლობის ინოვაციურ მიდგომებს აერთიანებს. ასე რომ, მსოფლიო არქიტექტურული შედევრები არა მხოლოდ არქიტექტორის, არამედ კონსტრუქტორის ცოდნისა და შრომის შედეგია, რომლის გარეშე ჩვენამდე ვერ მოაღწევდა ვერც მათ შესახებ ცნობა და ვერც თავად ნაგებობები.

როგორც საყრდენ ბოძს ენიჭება ფუნდამენტური ფუნქცია შენობის სტაბილურობისა და სიმყარის შესანარჩუნებლად, ასეა კონსტრუქტორის როლი მშენებლობასა და არქიტექტურაში. მისი ძირითადი მოვალეობაა შენობა-ნაგებობის სტრუქტურული უზრუნველყოფა, სამონტაჟო სამუშაოების ორგანიზება, შენობის ფუნქციური მოთხოვნების გათვალისწინება და მის უსაფრთხოებაზე, სიმტკიცეზე, საექსპლუატაციო ვადის ხანგრძლივობაზე პასუხისმგებლობა.

კონსტრუქტორის ძირითად ფუნქციებში შედის:

პროექტირება — კონსტრუქტორი პროექტირების ეტაპზე აქტიურად არის ჩართული. მას არქიტექტურული იდეები კონსტრუქციულ გადაწყვეტებში გადააქვს, ასევე უზრუნველყოფს კონსტრუქციული ნაწილის დამუშავებას, რომელშიც იგულისხმება: საინჟინრო-გეოლოგიური და გეოფიზიკური კვლევის შედეგები; MEP-ის პროექტი (Mechanical, Electrical, and Plumbing — მექანიკური, ელექტრული და სანტექნიკური სისტემების დაგეგმარება, მათი უსაფრთხო და ეფექტური მუშაობისთვის); სამშენებლო წესებისა და მოთხოვნების გათვალისწინება და ფოტოგადაღება, რომელსაც სამშენებლო პროცესი ეფუძნება.

პროექტის დეტალური გეგმის შედგენა — კონსტრუქტორი ასევე უზრუნველყოფს სამშენებლო მასალების შერჩევას, კონსტრუქციული ელემენტების დაპროექტებას, მასალების ხარჯთაღრიცხვის მოწესრიგებას და რესურსების დაანგარიშებას. კონსტრუქტორის მოვალეობაში შედის ტექსტური ნაწილის — ნახაზების, მასალათა უწყისების, ტექნიკური დოკუმენტაციის წარმოება და გრაფიკული სქემების მომზადება.

სამშენებლო პროცესის ზედამხედველობა — კონსტრუქტორი ზედამხედველობას უწევს მშენებლობის პროცესს, აკონტროლებს მუშაობის ხარისხსა და სამშენებლო მიდგომებს, პასუხისმგებელია უსაფრთხოების სტანდარტების დაცვაზე და მუდმივად ამოწმებს პროექტთან სამშენებლო პროცესის შესაბამისობას, ითვალისწინებს რისკებსა და მათ აღმოფხვრაში იღებს მონაწილეობას.

კომუნიკაცია მშენებლობაში ჩართულ ყველა მხარესთან — გარდა იმისა, რომ კონსტრუქტორი პასუხისმგებელია მშენებლობის ყველა ეტაპის მაღალი ხარისხით შესრულებაზე, ის ასევე აქტიურ მოლაპარაკებებს აწარმოებს მშენებლობაში ჩართულ სხვადასხვა მხარესთან — არქიტექტორთან, დამკვეთთან, სამშენებლო, სამონტაჟო გუნდთან, გეოლოგებთან თუ საინჟინრო სპეციალისტებთან, რაც მისგან მოითხოვს კომუნიკაციის კარგ უნარებსა და სხვადასხვა დარგის ცოდნას, რათა თითოეულ მხარეს ამომწურავი ინფორმაცია მიაწოდოს.

ამგვარად, კონსტრუქტორის საქმიანობა, რომელიც უძველესი ცივილიზაციებისგან იღებს სათავეს, გადამწყვეტ როლს ასრულებს როგორც პროექტირების დროს, ასევე მშენებლობის ეტაპზე, მისი რეალიზების პროცესში და უზრუნველყოფს შენობის სტაბილურობას, უსაფრთხოებას, მდგრადობას და ხანგრძლივ გამოყენებას. კონსტრუქტორის პროფესია კი ინოვაციური ტექნოლოგიების დანერგვასთან, ახალი მასალების გამოგონებასა და სამშენებლო მიდგომების დამკვიდრებასთან ერთად განვითარებას განაგრძობს და ახალ სტანდარტებთან ადაპტირდება.